Edhe java që e lam pas në komunat e Bujanocit, Preshevës dhe Medvegjës është karakterizuar me ngjarje të shumta të karakterit politik, social, kulturor, ekonomik dhe sportiv.
Në Bujanoc dhe Preshevës shënohet 28 nëntori
Fillimi i javës që po e lëmë pas ishte me shënimin e festës së 28 nëntorit ditës së flamurit.
Në sallën e shtëpisë së kulturës në Bujanoc është organizuar një program festiv për nderë të festës së 28 Nëntorit ku u mblodhën përfaqësues politik, qytetarë dhe nxënës.
Fillimisht është interpretuar himni kombëtar i Shqipërisë dhe pastaj program vazhdoi me recitimin e disa poezive dhe prezantuan me disa valle shoqëria kulturore artistike “Zëri i Luginës” dhe “Shqiponjat”.
Po ashtu edhe në në Presheëvs është shënuar 28 nëntori dita e flamurit.
Kamberi priti komesarin e lartë për pakica, Henrik Villadsen
Drejtori i Zyrës së Komesarit të lartë për pakica, Henrik Villadsen ka qëndruar sot në Bujanoc.
Drejtori i Zyrës së Komesarit të lartë për pakica, Henrik Villadse u interesua për së afërmi për situatën në Bujanoc.
Ai gjatë takimit të sotëm me kryetarin e komunës së Bujanocit Shaipi Kmaberin u informua për kërkesat legjitime të shqiptarëve, interesimin tonë për realizimin e planit 7 pikësh, funksionimin e paralelës së Fakultetit ekonomik në Bujanoc dhe tema tjera me rëndësi për komunën e Bujanocit.
Bashkëpunimi në mes komunës së Bujanocit dhe Zyrës së Komesarit edhe në të ardhmen do të jetë i ngushtë./Lugina Press/
Shefi i ri i Misionit të OSBE-së, ambasadori Andrea Orizio, vizitoi Bujanocin

Shefi i ri i Misionit të OSBE-së, ambasadori Andrea Orizio, gjatë ziztës së tij në Bujanoc u takua me kryetarin e komunës Shaip Kamberin.
Gjatë takimit të përbashkët u vlersua lartë bashkëpunimi në mes komunës së Bujanocit dhe Misionit të OSBE-së, rëndësisë së OSBE-së të cilën e ka luajtuar qysh nga krijimi i policisë multietnike dhe gjithë proceseve tjera politike në Luginë të Preshevës.
Ambasadori Orizio u njoftua edhe për interesimin dhe gatishmërinë e përfaqësuesëve politik për të vazhduar dialogun rreth Planit 7-pikësh dhe për t’u implementuar obligimet e marra nga Qeveria.
Integrimi i shqiptarëve në Institucionet publike u prezentua si interes i veçant, për implementimin e të cilit do të punohet pandërprerë./Lugina Press/
Kryetari Kamberi nënshkruan kontratë me vlerë 9 milionë dinarë

Është nënshkruar kontrata për shfrytëzimin e mjeteve nga Ministria e Ekonomisë për projekt dokumentacionin mbi Stacionin e pastrimit të ujërave të zeza.
Shaip Kamberi, kryetar i komunës së Bujanocit, gjatë ditës së sotme (e enjëte), ka nënshkruar kontratën e shfrytëzimit të mjeteve mbi projekt dokumentacionin rreth krijimit të Stacionit për pastrimin e ujërave të zeza. Vlera e projekt dokumentacionit të nënshkruar sot, është rreth 9 milionë dinarë
Në Tiranë është nënshkruar marrëveshje për formimin e Unionit e pesë komunave shqiptare
Kryetari i komunës së Preshevës Shqiprim Arifi deklaron se në Tiranë është nënshkruar marrëveshje për formimin e Unionit e pesë komunave shqiptare.
Ky union i komunave si Ulqini, Prishtina, Tetova, Tirana dhe Presheva sipas Arifit nuk do të thotë një destabilzim i regjionit dhe procesve pozitive që po ndodhin në Serbi.
Arifi spjegon se ky nuk është projekt nacionalist dhe se komuna e Preshevës është pjesë e asociacioneve tjera në Serbi dhe vendeve të regjionit.
Shqiptarët e Serbisë, siç thotë Arifi , dëshirojnë të përmirësojnë jetën në komunat ku jetojnë.
“Ky projekt nuk është kërcënim, por përgjigje për shkëmbimin e përvojave të shumë qyteteve. Shqiptarët në Serbi kohën e fundit tregojnë se duan të marrin pjesë në proceset në Serbi dhe si pjesë e shoqërisë ti zgjidhin problemet” ka thënë ai, transmeton presheva.com.
“Dua të garantoj se nuk është projekt nacionalist dhe nuk ka qëllim destabilzimin e rajonit dhe proceve që po zhvillohen në Serbi” ka shtuar ai.
Emigrantët në Preshevë të kënaqur me kushtet dhe mikpritjen
Kapacitetet e qendrave pranuese në Bujanoc dhe Preshevë janë po thuaj se të mbushur plotësisht, momentalisht gjenden rreth 1200 emigrantë.
Shumica e migantëve janë aty disa muaj. Grupe të vogla vijnë nga veriu, ndërsa në Preshevë vijnë migrantë nga qendrat tjera pranuese në vartësi nga kapaciteti i qendrës që janë të gatshme për temperaturat e ulët dhe dimrin.
Ambientet janë të ngrohta, ato nxehen ditë e natë. Secila familje ka dhomën e saj. Ata thonë se janë të kënaqur me kushtet dhe se iu është siguruar ushqimi dhe uji i ngrohtë.
Energjentët janë të siguruar sikur në Bujanoc ashtu edhe në Preshevë.
Në pasqyrën javore kemi përmbledhur edhe një lajm nga sporti
Arlind Fejzullahu nga Tërnovci përzgjedhet nga Kombëtarja Shqiptare U-15

Prej disa ditësh, në qendrën sportive të ekipeve Kombëtare në Kamëz janë zhvilluar seleksionime për fëmijë të moshave të ndryshme.
Në mesin e këtyre fëmijëve që morri pjesë dhe u përzgjodh ishte edhe Arlind Fejzullahu nga Tërnovci i moshës 2001-2002.
Arlind Fejzullahu hapat e para të futbollit i ka marrë në KF”Tërnoci” nga Tërnoci, me trajnerët e tij, Faruk Nazifi e Muharrem Elmazi.
Vlenë të theksohet se Arlindi futbollin e ka të trashëguar nga familja e tij, nga vëllau, futbolleri tashmë i njohur Arbnor Fejzullahu dhe nga babai Fehmi Fejzullahu i cili një kohë të gjatë kishte treguar suksese si futboller pranë KF”Tërnoci”.
Trajneri i Kombëtares U-15, Alesandro Reçenti, në një prononcim për ueb-faqen e FSHF-së jep detaje mbi këtë seleksionim
Sot dhe dje ka qenë seleksionimi i U-15 me lojtarët e datëlindjeve 2003 dhe 2004. Punojmë me këta fëmijë dhe kriteri kryesor i përzgjedhjes është cilësia individuale, aspekti fizik i tyre dhe vazhdimësia se çfarë ecurie do të kenë sa i përket aspektit cilësor futbollistik. Kemi parë më shumë se 100 fëmijë dhe disa prej tyre kishin cilësi mjaft të mira dhe do t’i ndjekim ata në vazhdimësi për ecurinë që do të kenë.
Më konkretisht mund të them që ishin 143 fëmijë, të cilët provuan të jepnin më të mirën e tyre në këtë seleksionim. Puna e radhës është ndjekja e tyre me kujdes”, tha tekniku italian, i cili po ndjek nga afër seleksionimet e të rinjve për ekipet kombëtare të moshave./Lugina Press/
Ndërkohë edhe këtë javë nuk kanë munguar as informacionet nga kultura
REGJISORI VALTON JAKUPI NOMINOHET PËR TU DEKORUAR NGA REPUBLIKA E SHQIPËRISË

Së shpejti do të mbahet dekorimi i personaliteteve të shquara në fusha të ndyshme si në kulturë, shkencë, letërsi etj.
Regjisori Europian Valton Jakupi është nominuar në mesin e shumë personaliteteve që të dekorohet me çmimin Harpa 2016 .
Në këtë eveniment është i ftuar edhe aktori i mirënjohur Naski Abdixhiku, ku dihet se është bashkëpunëtor në shumë filma të regjisorit Valton Jakupi. Ky evenimet është organizuar nga Fondacioni Kulturor “Harpa” dhe ka si qëllim të promovojë vlerat, të stimulojë personazhet më të vyera dhe t’i kthejë ata në një shembull frymëzues për të tjerët.
Çmimet Harpa, vijnë në një aktivitet të përvitshëm që Fondacioni “Harpa” organizon prej disa vitesh. Këto çmime janë themeluar si një hapësirë në shenjë mirënjohjeje për personalitetet e artit, kulturës, letërsisë, si dhe biznesmenë, institucione e politikanë që i ndihmojnë dhe zgjerojnë këto fusha.
-Çmimi i Madh Harpa
-Njeriu i vitit
-Shkrimtari më i mirë
-Poeti më i mirë
-Aktori/ regjisori i vitit
-Instrumentisti më i mirë
-Grupi më i mirë artistik
-Politikani më i mirë
-Sipërmarrësi i vitit
-Editori i vitit
-Gazetari më i mire
Ndërkohë që portali informativ Lugina Press ka marrë ftesë në përcjelljen e këtij evenimenti me çrast do të njoftoj më gjërësisht lexuesit për ngjarjen në fjalë./Lugina Press/
Rubrika “ Pasqyra javore “ mbështetet nga Ministria për Kulturë dhe Media e Republikës së Serbisë. Shkrimet e botuara në këtë rubrikë nuk paraqesin politikat e kësaj ministrie.
























