Pas shpalljes së situatës së jazhtëzakonshme në disa vende në Serbi, kryetari i komunës së Buajnocit Nagip Arifi ka vizituar disa terrene ku mund të ketë rrezik për banorët e kësaj komune.
Kryetari i komunës së Bujanocit Nagip Arifi i cili njëherit është edhe komandant i shtabit për situata të jashtëzakonshme, pas të reshurave të shumta të shiut dhe shpalljes së situatës së jazhtëzakonshme në disa vende në Serbi ka vëzhguar gjendjen e lumit në fshatin Tërrnoc, pastaj lumin “Morava” në fshatin Lluçan, si dhe urën e moravës jugore në drejtim të Jugokopit.
“Sa i përket situatës në komunën e Bujanocit është stabile dhe nën kontroll, dhe nuk ka ndonjë rrezik për banorët e komunës së Bujanocit. Jemi në gjendje gadishmërie nëse situata del nga kontrolli” tha mes tjerash kryetari Arifi.
Po ashtu sot shtabi për situata emergjente të cilin e drejton kryetari i Komunës Nagip Arifi kanë mbajtur mbledhje të jashtëzakonshme në të cilën është shqyrtuar situata aktuale pas reshjeve të shumta të shiut edhe në Komunën e Bujanocit.
Ndërkaq në shumë vende në Serbi është shpallur gjendje e jashtëzakonshme ndërkohë po qe se vazhdojnë edhe me tej të reshurat e pandërprera të shiut, pritet që Qeveria e Serbisë të shpall gjendjen e jashtëzakonshme në tërë territorin e republikës së Serbisë./Lugina Press/







