Në Shkup sot do të mbahet protesta masive për largimin e qeverisjes aktuale të kryeministrit Nikola Gruevski.
Mijëra aktivistë dhe simpatizantë të partive opozitare maqedonase, përfaqësues dhe përkrahës të shoqërisë civile maqedonase dhe shqiptare, qytetarë të komuniteteve të ndryshme kanë paralajmëruar pjesëmarrjen në këtë protestë që nis në ora 14.00.
Drejtues lokal të opozitës kanë theksuar se kanë probleme dhe pengesa në transportimin e protestuesve drejt Shkupit.
Protesta do të organizohet para Qeverisë, ndërsa lideri i opozitës Zoran Zaev ka theksuar se nuk do tërhiqen nga protestat dhe do të qëndrojnë të ngujuar para Qeverisë, deri në dorëheqjen e kryeministrit Nikola Gruevski.
Forca të mëdha policore kanë shtuar masat e sigurisë për protestën, ndërsa edhe opozita maqedonase ka bërë të gjitha përgaditjet për të siguruar mbarëvajtjen e protestës. Në protestën e opozitës do të marrin pjesë përfaqësues të korit diplomatik në Maqedoni, ish-ambasadorë të vendeve evroperëndimore, eurodeputetë dhe përfaqësues të ndryshëm ndërkombëtar, të cilët përkrahin përpjekjet e opozitës për rikthimin e demokracisë dhe besimin tek institucionet, pas aferës së përgjimeve, e cila nxjerrë në sipërfaqe kontrollin e fuqishëm të shtetit nga ana e klikës aktuale shtetërore.
Ndërkohë, partia në pushtet VMRO-DPMNE për të hënën ka paralajmëruar një kundër protestë, e cila ka në shënjestër opozitën dhe siç thuhet tentimin e saj për të destabilizuar vendin.
Ambasadorë dhe diplomatë në protestë
Për shkak të protestave gjithë-popullore në Maqedoni në Shkup ambasador dhe ish ambasador të huaj do të jenë në radhët e para të protestës.
Prezencën e ka paralajmëruar Ervan Fuere dhe shumë ambasador të huaj të akredituar në Maqedoni.
Me këtë garantohet se protestat do të jenë të qeta dhe demokratike ku qytetarët e Maqedonisë për herë të parë në histori do të kenë mundësin që të shprehin pakënaqësinë e tyre në mënyrë të qetë dhe të sigurtë ndaj qeverisë së kryeministrit, Nikolla Gruevski që dyshohet sipas opozitës se është i përfshirë në vrasje, krim dhe korrupsion .
Opozita akuzon se Nikolla Gruevski cdo herë inskenon konflikte mes maqedonasve dhe shqiptarëve me qëllim që të defokusoj vëmendjen e opinionit, në këtë linjë ishte edhe incidenti i fundit në Kumanovë ku u vranë 8 polic të njësiteve speciale.
Maqedonia rrezikon ta humb rekomandimin për antaresim në BE, pasi politikat e qeverise aktuale te Nikolla Gruevskit jane në kundërshtim me vlerat evropiane. Sipas opoztes, Gruevski dhe kushërinj tij Sasho Mijallkov kontrollojnë mbi 50 përqind te biznesit ne Maqedoni dhe nuk janë te interesuar qe Maqedonia te anëtarësohet ne Bashkimin Evropian.
Shqiptarët në protestë
Në rrjetet sociale, shqiptarët e Maqedonisë, janë duke bërë thirrje që sa më shumë të dalin sot në rrugët e Shkupit për të kërkuar rrëzimin e Qeverisë së Gruevskit. Daljen në rrugë për ta rrëzuar Gruevskin thuhet se e mbështet edhe Qeveria e Shqipërisë edhe kjo e Kosovës.
Sot, bashkërisht, shqiptarët dhe maqedonët, për herë të parë, pritët të dalin në rrugë për një kauzë të njëjtë: rrëzimin nga pushteti të Kryeministrit autoritar, Nikola Gruevski, i cili dyshohet për shumë krime të kryera gjatë qëndrimit të tij në krye të Qeverisë.
Gazeta Express mëson se shqiptarët e atjeshëm tashmë kanë marrë instruksionet e duhura prej qeverive të Kosovës dhe asaj të Shqipërisë, që të janë pjesë e protestës.
Përndryshe protesta është thirrur nga opozita e Maqedonisë, gjegjësisht LSDM e Zaev’it. Ky lider opozitar ka muaj që ka filluar publikimin e audio përgjimeve diskredituese për Qeverinë Gruevski. Të gjitha këto përgjime të publikuara flasin për krime monstruoze të kësaj qeverie – për korrupsion të përmasave pandemike.






