Kryeministri i Kosovës, Isa Mustafa, priti të hënën në takim kryetarin e Bashkimit Demokratik për Integrim (BDI) në Maqedoni, Ali Ahmeti, me të cilin biseduan për proceset aktuale në Kosovë dhe në Maqedoni dhe për bashkëpunimin ndërmjet dy shteteve.
Mustafa e njoftoi për progresin që po arrihet në Kosovë, duke theksuar angazhimin e posaçëm të Qeverisë së Kosovës në proceset integruese evropiane, dhe përkushtimin për thellimin e bashkëpunimit me vendet e rajonit.
Në këtë kontekst, kryeministri Mustafa vlerësoi rëndësinë e organizmit të mbledhjes së përbashkët ndërmjet Qeverisë së Kosovës dhe Qeverisë së Maqedonisë, përgatitjet për të cilën janë në fazën finale dhe që pritet të mbahet në muajin maj.
Kryetari i BDI-së, Ali Ahmeti, vlerësoi progresin që po arrihet në Kosovë në të gjitha fushat.
Ahmeti po ashtu shprehu përkushtimin e tij për të ndihmuar në fuqizimin e bashkëpunimit dhe shkëmbimeve ndërmjet dy shteteve, duke veçuar në këtë drejtim edhe organizmin e mbledhjes së përbashkët të dy qeverive. (INA)
Ahmeti – Thaçi: Shqiptarët nuk duan kriza të reja
Kryetari i BDI-së, Ali Ahmeti sot në Prishtinë ka sqaruar se cila është agjenda dhe tema e takimeve me krerët shtetëror të Kosovës.
Këto komente ai i bëri pas takimit me zëvendëskryeministri i Kosovës Hashim Thaçi. Ky i fundit tha se Kosova çmon rolin e Ahmetit për afirmimin e shqiptarëve në Maqedoni komunitet ky që po kontribuon në shtet ndërtimin dhe integrimin e Maqedonisë.
Ai tha se takimi mes dy qeverive që do të ndodh shpejt do të kontribuoj në shtimin e marrëdhënieve mes dy vendeve dhe do të hap një perspektivë të re.
Thaçi shtoi se një Maqedoni stabile dhe evropiane është në interesin e Kosovës dhe integrimit në BE.
Ndërsa, Ali Ahmeti tha se në takim me Thaçin ka informuar atë me situatën politike në Maqedoni.
Ndërsa i pyetur rreth incidentit në Gushincë, Thaçi tha se institucionet e Kosovës mbështesin fuqishëm marrëveshjen e Ohrit e cila është arritur me mbështetjen e faktorit ndërkombëtarë.
Ai tha se është në interesin edhe të Kosovës paqja në Maqedoni pasi asnjë incident nuk i ndihmon as Kosovës e as Maqedonisë.
Ndërsa, Ahmeti tha se janë në komunikim me shqiptarët e zonave për rreth kufirit me Kosovën dhe se askush nuk e do dhunën.
Ai tha se shqiptarët në Maqedoni nuk duan kriza të reja por jetësim të marrëveshjes së Ohrit dhe sa më shpejt të jenë të barabartë me maqedonasit është më mirë për të gjithë.
“Shqiptarët në Maqedoni nuk duan kriza dhe luftëra të reja, shqiptarët në Maqedoni duan jetësim dhe materializim të Marrëveshjes paqësore të Ohrit, në mënyrë që sa më parë të jenë të barabartë me bashkëqytetarët e tyre maqedonas. Sigurisht se nuk ka qenë dhe nuk do të jetë i lehtë zbatimi i tërësishëm dhe i menjëhershme i marrëveshjeve paqësore. Çdo dokument i pas luftës ka vështirësitë e veta. Çdo gjeneratë i ka idealet dhe idealistët e vet, por unë mendoj se tanimë ata idealistë dhe ato ideale, shqiptarët e Maqedonisë duhet t’i materializojnë, duke u anëtarësuar vendin i tyre në NATO dhe BE, duke realizuar deri në barazi të plotë në të gjitha drejtimet me bashkëqytetarët e tyre maqedonas”, ka thënë Ahmeti.
Ai ka deklaruar se nuk është qëndrim i qeverisë së Maqedonisë se qytetarët e Kosovës kanë kryer aktin në Gushincë. Sipas tij ky qëndrim ëshjtë i ndonjë zyrtari individual.
Ahmeti shtoi se janë në Qeveri për të ndihmuar dhe zgjidhur problemet. (INA)
