Home Aktuale Azilkërkuesit kosovarë në Gjermani, frikë nga infeksionet (Foto)

Azilkërkuesit kosovarë në Gjermani, frikë nga infeksionet (Foto)

15
0
SHARE

Një azilkërkues nga Kosova, që gjendet në një kamp në Gjermani, ka përshkruar kushtet e vështira dhe mënyrën se si po trajtohen atje. Ai ka treguar se në kampin ku po qëndron janë afër 400 persona dhe të gjithë flenë në një pjesë të improvizuar dhe në shtretër plazhi.

“Në këtë kamp jemi rreth 400 vetë dhe të gjithë flemë shumë afër njëri-tjetrit. Janë kushtet mizore, ftohtë, era e rëndë, dhe flemë në shtretër plazhi”, ka thënë ai për koha.net. “Vendi është katastrofë. 200 veta e shfrytëzojmë një banjë. Askush nuk po guxon të lahet për shkak se po frikohemi se mos po marrim ndonjë infektim”.

 

Ky i ri ka treguar për koha.net se është i sëmurë me kancer dhe rrugën për Gjermani e ka marrë pasi ka dëgjuar se ka shërim, por edhe pse në gjendje të rëndë në kampin ku ai po qëndron nuk kishte marrë trajtimin e duhur.

“Unë jam i sëmurë me Lymphona Hodgins dhe kam shpenzuar shumë në Kosovë për t’u shëruar nga kjo sëmundje, por ajo më është rikthyer pesë muaj pas tretmanëve. Këtu më kanë pritur në mënyrën më të keqe të mundshme edhe pse ju kam treguar letrat se jam i sëmurë me kancer”, ka thënë azilkërkuesi.

 

Ai ka treguar se kujdesin e vetëm në Gjermani e mori pasi u gjend në spital, pas gjendjes së rëndë shëndetësore si pasojë e kushteve të këqija në kamp.

“Tre ditë qëndrova në këtë kamp dhe më pas më ra të fikët. Pasi u zgjova pash veten në spital. Aty u kujdesën mirë dhe dy javë më vonë më rikthyen në kamp. Tani më premtuan se do të më mbajnë mirë, por mbetet të shihet”, ka përfunduar bisedën për koha.net, teksa ka sugjeruar bashkëkombësit që të mos marrin rrugën e mërgimit ilegal.